Tlawmna

Chhiartur:Luka 22:24-27,Thufingte 22:4

Kan thupui sawi tur hi Thupui sawi hlawh tak a ni a,Pathian thu hi chu sawi tawh leh tih tawh a awm loh avangin tun tuah pawh hian kan sawi leh dawn a ni.

            Kan Bible chang chhiar takah khan Tlawmna pawimawh zia kan hmu ang a,Isua zirtirte kha Vanrama ropui ber tur chungchangah an in hnial ve laih laih a ni,a then te kha chuan thawk tha leh ti tha te pawh an in ti ve hlawm a ni mai thei,amaherawh chu Isuan a chhanna ah khan Vanrama ropui ber tur chu mi inngaitlawm te an nih si zia a rawn sawi a nih kha.RIngtu nunah hian Tlawmna tello chuan Pathian rawng a bawl tak tak theihloh va,tlawmna nun hi Pathian ze ropui tak a ni bawk a ni.

1.Tlawmna Nun nei tur chuan thih angai: Thil nung reng reng hi chu duh duha sawi sak leh thuhnun an har thin.Amaherawhchu,Pathianin a duh duh min hman theih tura insiam nan chuan tlawmna nun kan neih a ngai tlat bawk si.Tlawmna nun nei tur chuan thih angai kan tih hian he mihring taksa thihna lam hi a kawk lova,keimahni mi mihring mihrina thihpuina lam zawk a ni.Keimahni a mihring mihrina hi ala dam chhung chuan kan tlawm thei ngailovang.Mihring khawsak hona reng rengah pawh hian mi ingaitlawm tak bula awm chu a nuam a,mi chapo leh insawi thei tak chu tute pawh hian kan kawm tha peihlo chu a nih hi.Pathian leh kan mihringpuite hmaa tlawmna chhan tur kan hriat loh chuan Chapona chhan tur kan hria tihna a ni,Thufingte 18:12 ah chuan, “Mihring rilru chapo chu boralna hmaah a kal a,inngaihtlawmna chu chawimawina hmaah”a ti a ni.

            Kan Lal Isua kha mihringte chhandamna hna thawk tur khan a Lal thuttleng kalsanin kan tan kross-ah a rawn thi a,Tlawmna nun nei tur chuan channa nun kan neih te pawh a ngai hial awm e.Tlawmna nun chuan midangte a ngaidam thei thin a,a ngaidam mai nilovin an dikloh zia a hriat chian poh leh Pathian hnenah ngaihdam an dil sak zawk hial thin.Lal Isua Kross lera a awm lai khan Farisai thenkhat te khan a chheihnawmnah tih kan hria a,mahse kan Lal Isua chuan, “Ka pa an ni ni ngaidam rawh,an thil tih te an hrelo a ni”tiin ngaihdam a dil sak zawk a nih kha.Keimahni nunah han inbih let ve chhin ila,miin kan chanchin a chhe zawnga an sawi emaw min hek hian keimahniah insawifiah chakna a rawn lang nghal a,a ni pawh enge a nih bik le? Tiin bulkan han tan phawt a,kan ril rem loh zawng taka a tawng phei chuan rik buan buan nghal mai hi kan chak thin.Tlawmna nun nei tur chuan insum theihna te pawh kan neih makmawh tur a lo a ni.Kan rilruin Lal Isua te chu Pathian fapa ania,engtin nge kan tluk teh lul ang kan ti mai thei,Ni e,engti kawng zawng mahin kan tluk dawn lo,amah Lal Isua ngei pawhin amah tluk turin min ti lo,amaherawh chu mihringte hi amah anga kan awm ve theihna turin mihringte nihdan pangaiin a rawn piang a,a seilian a,mihring te nihna tam tak a nei ve a ni.Tin,amah zir a,amah entawn turin min duh tih erawh kan hriat a atha khawp mai.

2.Tlawmna nun chuan remna a thlen thin:Isaia 9:6 ah chuan, “Kan tan naupang a lo piang a,fapa pekin kan awm ta,rorelna chu a kokiah a chuang ang a,a hmingah chuan Remruattu Maka,Pathian chaka,Chatuanpa,Remna Lal an la ti dawn si a” tih kan hmu a,he lai chang a kan lak chhuah duh ber zawk chu REMNA LAL tih lai hi a ni.Kuminah pawh hruaitu thar te thlangin KTP pawhin bul kan tan chho leh mek a ni a,tumah tling leh tha kan awmlo.Chutih rual chuan hruaitu dinhmunah kan ding a,hruaitu chu HOTU ang an nilo kan tih thin kha.Hotu chuan thu pek a pe a,hruaitu chuan a ti hmasa a,à enkawlzui nghal thin.Lal Isua kha khawvel Lal a ni satliah lova,REMNA LAL a ni bawk tih hriat a tha awm e.REmna Lal ni tur khan tlawm takin a rawn piang phawt a.Chu ta tang chuan Pathian nen kan inremna turin REMNA hna a thawk tan a nih kha.Tun kumah pawh hian Hruaitu din hmunah kan awm a ni mai thei,member te huikhawm tu leh remna palai hna thawktu nge kan nih a,member te hnawt darhtu kan ni ang tih ngaihtuah reng a tul a ni.Hruaitute atang ringawt chuan Pathian rawng a bawl theih lova,memberte pawh kan pawimawh a ni.Ti hian tehkhin ila,HRuaitu te hi Motor engine ang an ni a,motor pawh a engine ringawt chuan a kal thei biklo,a ke a that angai a ni.Chak deuh a tlan tur phei chuan a ke leh thil dang te a in rem that a ngai tlat.Motor engine chianglo chu thui akal theilo ang deuh hian,OB te leh Committe member te,kan inlungrual loh a,kan innghirngho chuan hmalakna tur kawng hrang hrangah hian kan thawk ho rei thei dawn lova,chumi thlen tur chuan tlawmna nun kan neih a pawimawh ber a ni.Mahni tawka hreve tawk leh fing ve tawk a in ngaihna hi midang,kan rawngbawlpuite tan a hnawksak duh khawp mai.Memberte pawh kan fimkhur angai a,member kan nih avangin duh duh sawi a,pawt mai mai thei kan ni biklo tih kan inhriat reng a tul awm e.Thenkhat chuan kan duh dan leh ngaihdan anga thil a thlen loh chang te hian OB te dem mai kan ching thin,hei hi thil tha lo tak a ni a,insawiselna hian rah tha a chhuah lo va,tha tur a kan duh anih chuan kan fuih zawk tur a ni.Tin,OB te hi political party angin tumah an in candidate ve lem lova,manifesto neih bik pawh an awm lem lo,kan duh a kan thlang anih tawh chuan thahnem ngai taka kan thawhpui thiam te pawh a tul hle a ni.

3.Tlawmna nun nei tur chuan tawngtai tam angai: RIngtuten Pathian kan biak pawhna ber chu tawngtai hi a ni a,kan tawngtai peihloh tlat chuan Pathian nena len dun hi thil theih a ni lo.Ngaihzawng kan neih chuan an bula awm kan thlahlela,an bula kana wm chuan kan nuam veng veng thin.A chhan ni ber a lang chu an mahni khan kan rilru an luah hneh vang a ni thei ang.Mahse ngati nge tawngtai hi kan peih lo hem em?Tawngtai chu sawiloh inkhawm tak ngial pawh kan peih thin loh.Pathian hi kan thlahlel lova,a bul awm kan chak lova,kan be chak lo niberin a lang.Pathian chu kan tihtheihloh leh thawh theihloh thawktu atan chauh a mi kan duh thin?Kan duh sawina hmun tur chuah a ni bik em ?Lawm thu kan hrilhna tur te pawh a ni ve dawn lo’m ni?Kan mangan lai leh lungngaih lain kan ngaihzawngte leh thianten damna leh thlamuanna min pe thei em tih kan chhut fo a pawimawh khawp mai.Tlawmna nun chu Pathian zia anih thu kan sawi tawh a,chu Pathian zia nei tur chuan amah chauh chu min pe theihtu a ni bawk si a,min pe theitu kan biak hreh tlat a kan biak ngaihloh chuan kan nei har ngawt ang?Tunah hian cheng nuai 2 min dil tau la,eng tikawng zawngmah ka pe thei loving che u,a chhan chu pek tur ka nei miau lova,Messi tee maw khu han inhmel hriat ula chuan tih takzeta in dil chuan in hmu loving tih tu nge sawi thei.Setana hian engti kawng zawngmahin tlawmna nun min pe dawn lova,neih pawh a nei heklo.A neitu leh kawltu PAthian kan dil a,kan biak tam angai a,chumi tur chuan kan tawngtai tam a ngai a ni.